回暖 1月31日 星期三
今朝已經見唔到肥大身軀嘅雪人,天氣暖返少少,人都定D......不過我好似著得多過頭咁,我見有D人只係著住件薄薄嘅恤衫,有個女仔仲誇到著短衫短裙,相反我仲著長衫加大褸,真失敗......其實今日班美國鬼佬又嚟香港,好彩冇拉大隊上嚟公司,如果唔係又捉住我地講鬼話,到時就麻麻煩煩,雖然唔知佢地嚟HK做咩,但係多數為公事啦(May be......!)~
後記: Life is not a final. It's daily pop quizzes. (人生不是一次期終考試，而是天天不斷的突擊測驗。

更冷 1月30日 星期二
老闆終於都搵其他同事幫我手喇,真係等到頸都長埋,我一向都對工程唔上心,但係都冇計,為搵食呢一行真係搵到錢,又唔使體力勞動,只係需要用腦同埋把口,如果加埋用心去做,一定會做出成績出嚟,可惜......不過我有時都會用一點點心嘅,受人錢財替人消災,我收得老闆錢當然要做落去啦,好同唔好又唔到我話事,唯有勤力D啦~
後記: 夫妻過於疏遠，愛情會枯萎；但過於親密，抹殺對方的獨立性格，婚姻則難以維持。

望晴寒來 1月29日 星期一
完全想像唔到今日會係開心嘅一日,星期六晚飲得太多酒,星期日又冇覺好瞓,所以尋晚十一點就上床休息......今朝好準時就起身,基本上同我個史力奇鬧鐘到步,佢一響我就彈起身,點知一腳落地就FEEL到得十度嘅可怕,寒冷係由地板傳送到腳趾尾,只要再郁一郁隻腳,寒流就會立即衝激全身,直達腦神經......之後洗面刷牙仲攞命呀,都唔使我再形容比大家聽喇,大家都係感同身受啦! 返到公司老闆就一個人一個人咁叫D同事入佢房,每一位同事都帶住唔同嘅面口出嚟,而我就好開心,因為終於都等到第一年嘅雙糧喇~
後記: 愛情沒有了潤滑劑，夫妻很容易會說：「和我結婚時，他/她不是這樣的。」

寒流補充 1月28日 星期日
工作過後當然係去吃喝玩樂啦,又想講星期六辛苦一人工作之後,出發去玩嘅事,當日所有同事都極度期待收工嘅那一刻,當然包括我在內啦......兩點過後成間公司得返me一個孤家寡人留守,工作自然要繼續進行啦,之後就要出發去地盤,做做做......做到收工嘅六點幾喇,第一時間先call齊幾個蒲友,約好之後就齊齊食個晚飯,跟住例排去唱K,而今次包括我在內一共有八個蒲友去,開左間大房玩,之後就愈來愈人加入,最高峰同一時間有成廿個人,認真認真熱鬧呀......算係最多人嘅一次啦,大家都玩得好High,而我都High大左搞到成晚狂飲酒,不停輸咪不停要飲囉~
後記: 男女天生就是對立的。我們怎樣才能擺脫DNA的支配，從此以後過著幸福的生活。

持續寒冷 1月26日 星期五
本來今日算係幾優閒,因為星期五囉,唔係,應該係話聽日係星期六至真,要用一日嘅時間去諗下週末點過,其實都幾傷頭腦,並唔係我有太多節目,而係我只係想安靜咁休息番一日,不過聽日全公司嘅同事放工之後,就會約埋一齊去大埔BBQ,之前都有叫過我去,仲比參加表格我,不過我心諗同您地班人又冇咩好傾,加上天寒地凍,所以最後我決定唔去......唯一可以做嘅只有一個,好老土都要講多次,就係工作工作再工作~
後記: 中年男人的心像塊禁地，他們自己不走進去，也不讓別人進入，日子久了，索性把門鎖上。

寒冷 1月25日 星期四
自從再次食返有肉嘅晚餐之後,我身體裡嘅能量終於都返出嚟,直頭係元氣爆發呀......今日仲凍過尋日,我住响屯門都有點受不了,原因並唔係我身體有問題,都唔係我怕凍,而係衣服出問題,上一年天氣一直都凍唔起,就算真係好凍都唔會持久,所以我將好多舊嘅冷天衫通通掉哂......輪到今年嘅冬天,突然之間好似愈來愈凍哂,而且冬令時間長左,搞到我只係著返D又舊又薄嘅衫,雖然我都唔係好介意,之不過做人最失敗嘅莫過於苦了自己~
後記: 太極拳是凝聚中國傳統文化於一身的明珠，猶如崑崙山上的一棵靈芝，或是華山養育的一株仙草。

勁凍 1月24日 星期三
原來寫blog竟然可以夢想成真,當我尋晚寫blog嘅時候,一路寫一路blog,尋晚嘅主題大家已經好清楚,幾日都冇肉食嘅生活真係有D唔習慣,食完齋飯好似冇食過咁,經過幾日食齋嘅日子之後,我就有感而發,寫低沒有食肉的日子,即係無肉不歡嘅自己......今晚一心諗住都係食齋,所以都冇太大嘅希望存在,但係當我打開大門返屋企之際,竟然比我嗅到好熟悉嘅雞翼香味,我第一時間去食...食...食~
後記: 要求加薪前，應先了解同行的薪資水平，對於自己的市場價值，要有實際估計。

陰天 1月23日 星期二
原來屋企失業會帶嚟好多麻煩,我嘅母親大人失業已經有一段日子,而家我見佢好積極咁搵新工,可惜一個冇咩學歷而又五十幾歲嘅女人,出嚟競爭咁大嘅社會又可以做咩呢? 一句講哂總之就苦了我啦......阿媽由星期六開始冇再煮過肉,包括豬牛羊雞魚,日日都係食齋菜,其實清清地轉下口味都唔錯,之不過又唔使咁多日都唔煮呀,最攞命就我每日都帶飯盒返公司食,即係當晚食咩嘢,之後一日嘅中午就食返咩嘢,咁都係冇肉到肚啦~
後記: 保持野性，永不馴服‧‧‧‧‧‧盡情叫喊、哭與祈禱。

爆寒流 1月22日 星期一
好耐都冇去戲院睇戲喇,尋晚因為太過無聊,瞓响屋企無所事事,一個無聊嘅中午同下午就咁就白白浪費,至於上午因為要休息,所以唔算係浪費,我好珍惜瞓覺嘅時間,平時已經冇覺好瞓,加上今個下半月仲要早十分鐘起身(避免再遲到呀!)......唯有星期日瞓多兩個鐘頭補返數啦! 講返套戲先,兩個字『一流』,絕對係高水準嘅作品,好真實咁將鑽石戰爭搬上大銀幕(好行呀!),片中所講嘅T.I.A.簡直係正~
後記: 我是個漫遊者，沒有預定目的地，只要在路上，就會高高興興。

大寒 1月20日 星期六
放半日工其實算唔錯,雖然而家政府推行五天工作週,但係如果公司跟足勞工法咁放假,咁就唔同講法,一般工程公司大多數都係做足六天,連坐寫字樓嘅都無一幸免,我以前一直都係返六日工,邊有諗過會有機會返五日半咁開心呀......自從轉新公司之後就改變,放工早過以前,星期六返半日,通通都改變哂,可惜香港嘅公司太過向錢看,做多半日同做少半日又有咩分別呢? 可必一定要同政府唱反調,係都唔肯跟隨政府五天工作週~
後記: 我從不認為人要得到了某些東西後，才會幸福、快樂。